1Th 5 | ATA | STEP | Ioxe, ta vivixe. Nexi umomomo sou takaukavu mo tavikalangengixu voxo noxou Tila Iesu lexe Anu ulivu une'e talu uasi,

a 5:2Mat 24:42-43; 2Pi 3:10; Pal 3:3

b 5:3Mat 24:39; Luk 21:34-35

c 5:5Rom 13:12

d 5:8Ais 59:17; Ep 6:14, 17

e 5:10Rom 14:8-9; 1Te 4:14

f 5:142Te 3:6, 11

g 5:15Rom 12:17; 1Pi 3:9

h 5:16Pil 4:4

i 5:18Ep 5:20

j 5:19Ep 4:30

k 5:21-221Ioa 4:1

l 5:232Te 3:3

m 5:25Kol 4:3; 2Te 3:1

1 Thessalonians 5

1 Ioxe, ta vivixe. Nexi umomomo sou takaukavu mo tavikalangengixu voxo noxou Tila Iesu lexe Anu ulivu une'e talu uasi, 2 ^axo ngingi ngelavu laixe lexe voxo ane ne uxali ukulukengengi loxo itema sou pakali uxali no 'olovoxo lixinu. 3 ^bXe no mine ta mitema ivikala lexe, “Nenge texolu laixesi mo ta'umolu mii vile uasi,” la mii sou u'oxo masuane'i ne uxali ukulukene'i loxo navunavu uxali noxie sema sou ivo'onu 'ilie. Ia ane'i imomomo sou imaxalexu mii ane ne uasi.

4 Io, ta vivixe. Ngingi ngaxolu no isivoxo uasi, la sou voxo ane ne uxali ukulukengengi loxo itema sou pakali uxali no anu uasi. 5 ^cNgingi latala ne, ngexali loxo aso xe lamana ta 'olu, ia nenge no anu 'olovoxo xe isivoxo la uasi. 6 La sou nenge taxolu loxo ta mitema sou iai uasi, ia ienge lamanasi mo tautitiiou xe nenge menge tasaxila'inge no anu. 7 Xo ane'i ane iai ne, iai no 'olovoxosi xe ane'i ane iiexu lexa pekia'u mo ixovulaulau ne, iiexu no 'olovoxosi. 8 ^dIa nenge ta mitema ane texolu no anu lamana, la sou nenge menge tasaxila'inge laixe mo nenge tamuxamuxaxu tanenge noxou Lataua mo tamasaxau manina aloxo itema sou 'oto'oto utaanu tokolomo pekia'u sou utaluxu lutunu xe tamolo tanenge mo taloopala Lataua sou upamaulinenge aloxo itema sou 'oto'oto utaanu kisivalu e pekia'u sou utaluxu kisou. 9 Xo Lataua musosovosinge sou lexe taxolu no anu la'ia noxou uasi, ia upamaulinenge noxou Tilasinge Iesu Kalisito. 10 ^eAnu musolisinge sou lexe nenge nenge'a anu Iesu taxolu tapita no voxo ane Anu ulivu une'e. Ia lexe nenge tamauli uasi ia tasoli, la anu mii vile uasi, nenge nenge'a tamauli mo taxolu tapitasi. 11 La sou ngingi ngapeletotosinge ngatongato'o mo ngasu'ulingengi ngatongato'o aloxo ngingi nga'oxo'oxo vaimomo 'o.

Vaikala Kaluxusou

12 Ta vivixe, nexi talingainge aloxo 'o. Ngingi ngatoxone'i ane'i ane ixaxai pekia'u no taiingengi. Xo Tila musosovosi'a lexe ane'i iulaxungengi mo imomosou xavutalamengi. 13 I'oxonu xaixai aloxo ne, la sou ngingi ngatoxone'i xe tanengixa'a mo ngamasaxai'a manina. Mo ngingi ngongi'a ngaxolu, la opongengi uai se'isisi. 14 ^fMo ta vivixe. Nexi tapeletotosinge lexe ngingi ngamomosi'a ane'i ane itotosa mo ixaxai uasi. Mo ngingi nga'oxo pekia'a ane'i ane imama'u mo ngasu'uline'i ane'i ane uao mamalaxa'a. Xe ngingi nga'oxo se'isisi noxi'a ta mitema. 15 ^gIa mamu sou ngakolinu 'ili'ilixo masumasua e ta mitema i'oxo une'e noxinge. Ia no voxovoxo utotomu ne, ngatovo sou nga'oxonu 'ili'ilixo laixe noxinge ngatongato'o mo ulai noxi'a ta mitema ukalusi.

16 ^hUtotomu ne, nga'osa'osa,

17 mo ngakilaka no voxovoxo utotomu.

18 ⁱMo ngalemo laixe musuku ulai noxou Lataua no anu mimii tavu'alo ukalusi. Xo ngingi ta mitema ane noxou Kalisito Iesu, la sou Lataua mumasaxainge lexe nga'oxonu 'ili'ilixo ane ne.

19 ^jIa mamu sou ngasitanoxu ulee noxou Lataua loxo nenge tasitanoxu navu. 20 Mo mamu sou ngaxiu tumalingeu vaikala palomatana noxou Lataua. 21 ^kIa ngatilovosou laixe vaikala tavu'alo ukalusi, mo sou ngalavu lexe ane laixe manina la ngatetelisou, 22 xe ane masua la ngaxiu tumalingeusi.

23 ^lNexi talinga lexe Lataua ane itema sou opo se'isisi u'oxongengi ngaxali loxo ngingi ta na'u. Mo talinga lexe Anu molu usaxila'u tanenge ilou uleenenge mo vasimenge, mo sou Tila Iesu Kalisito ulivu une'e la uvikala masua une'e noxinge uasi. 24 Lataua ane mu'avalinge ne, nenge telavu lexe Anu umulinu vaikala noxou, la u'oxonu loxo Anu mulemolu.

25 ^mTa vivixe. Ngalingasixe kalumo. 26 Xe ngasexelaxa'a ta vivinge ukalusi loxo ngingi ta mitema noxou Lataua. 27 Mo eni avikalangengi loxo Tila uvikalangengi lexe ngingi ngaitisou kaukavu ane 'o ulai noxi'a ta vivixe ukalusi.

28 Nexi talinga lexe alauna noxou Tila noxinge Iesu Kalisito uxolu noxinge.